Coñece Muras

A nosa Feira do Poldro e do Gando do Monte

Concello de Muras | A nosa Feira do Poldro e do Gando do Monte |

Descúbrea neste vídeo!

En Muras vivimos ao redor dos nosos cabalos todo o ano, pero ésta é unha data especial: ten máis de 30 anos e reúne xente veciños e gandeiros de toda a comarca baixo as altas árbores do Monte da Gañidoira, a 700 metros sobre o mar. Carreiras de cabalos, artesanía, concurso de gando… Despois de 31 edicións recibiu en marzo de 2019 o recoñecemento da Xunta como Festa de Interese Turístico Galego.

O día dá para todo: para xantar, negociar e goxar vendo ou participando das carreiras cuns cabalos que medran prácticamente en liberdade nas nosas serras. Boa parte deles son exemplares de Pura Raza Galega, herdanza dos castrexos, pobos indoeuropeos que habitaron estas terras e que, probablemente, introduciran exemplares de poni de cabeza pequena e ancho lombo. Son animais tan recios coma mansos, que gozan dunha privilexiada vida. A nosa provincia, Lugo, é a que suma un maior número de gandeiros e gandeiras que se dedican a crialos.

Nos curros da Gañidoira tamén se negocia a venda de vacún e de cabras autótonas, non só de poldros. O movemento de animais e gandeiros, os postos de artesanía, os concursos de tala de troncos, de adestramento de cans, a música e o bo xantar, fan dela unha festa auténtica e moi nosa, pero que nos gusta compartir.

Ademais, tamén é unha data gastronómica das que ter na axenda, porque organizamos as Xornadas de Degustación de Carne de Poldro, o momento perfecto para probar tapas e pratos cunha das carnes máis saudables do mundo, pero por descubrir para moitos. Hai onde escoller: dende as curadas como lombos, salchichós, chourizos e cecinas, ata receitas quentes e contundentes sobre o plato ou en hamburguesas.

A organización realízana o Concello murés coa colaboración de Puraga e as entidades Atila e Jockey –importante para que todo vaia perfectamente durante as carreiras de cabalos profesionais e de afeccionados-  e inclúe na axenda: rutas para a observación do gando no o Xistral, exhibición de poda en altura e ata 5.600 euros para galardóns aos gandeiros e os seus animais. Non che perdas a vindeira feira!

Un ambiente único

O movemento de animais e gandeiros xunto coa música, os postos de artesanía e o bo xantar, fan dela unha festa auténtica e moi nosa, pero que nos gusta compartir

Á mesa

Tamén organizamos Xornadas de Degustación de Carne de Poldro, o momento perfecto para probar tapas e pratos cunha das carnes máis saudables do mundo

Onde estamos

DISTANCIAS

Ferrol. 60,5 quilómetros. 45 minutos collendo pola AG-64
Lugo. 74,3 quilómetros. 50 minutos collendo pola A-6
A Coruña. 86,2 quilómetros. 1 hora collendo pola AP-9 e AC-564
Santiago de Compostela. 129 quilómetros. 1 hora e 20 minutos collendo pola AP-9
Pontevedra. 158 quilómetros. 1 hora e 50 minutos collendo pola AP-9
Ourense. 172 quilómetros. 2 horas collendo pola N- 540
Vigo. 213 quilómetros. 2 horas e 15 minutos collendo pola AP-9
Xixón. 224 quilómetros. 2 horas e 5 minutos collendo pola A-8
Oviedo. 228 quilómetros. 2 horas e 10 minutos collendo pola A-8

161_2015_MURAS

De ruta

Feira do Mel de Montaña

Concello de Muras | Feira do Mel de Montaña |

Un mel escuro e de breixo

Cada mel ten o seu sabor, uso, propiedades e gusto, e o das colmeas de Muras é monofloral de breixo, un arbusto que se dá por toda Galicia e que ten esas pequenas e fermosas flores branca ou malvas. Os nosos produtores saben o difícil que é conseguir un mel desta calidade, pero consígueno.

Temos 25 explotacións apícolas dadas de alta, colmeas que moitas veces son un importante complemento económico para os gandeiros. E para dar a coñecer este excepcional mel o que se merece organizamos esta feira, cuxa primeira edición foi o 22 novembro de 2015. Aquí tedes un vídeo da edición de 2018.

Hai concursos de calidade do mel , degustacións ?, postos con artesanía e gastronomía, obradoiros para a cativada, música para ambientar… un plan perefecto para pasar unha fin de semana entretida.

XUNTANZA NO VIVEIRÓ

Á beira da coñecida Casa Cándida é o lugar escollido para esta cita gastronómica baixo carpa, onde poder probar e mercar mel directamente do produtor ou produtora. Non só hai apicultores: tamén veñen artesáns da Terra Chá cos seus “meleiros”, eses útis utensilios de madeira para apañar o escorregadizo doce, xunto con artesáns do coiro, da madeira, cesteiros, accesorios e complementos… Non falta unha selección de queixos como os da D.O galega San Simón da Costa –dos  mellores acompañantes-, xunto a postos de empanadas, embutidos e licores, ademais dunha pulpeira. Os gaiteiros amenizan unha cita que todo o mundo disfruta.

Se ves ata a nosa Feira do Mel de Montaña poderás apuntarche para facer cursos, e obradoiros -hainos para grandes e pequenos-, acodir a algunha charla e gozar ao tempo que aprendes algo co oficio dos mellores cociñeiros galegos. Para os que non vivides nos arredores, é moi sinxelo chegar canda nós, pincha aquí para saber cómo.

 

 

Romaxe Artesá da Chaira

Concello de Muras | Romaxe Artesá da Chaira |

O Concello de Muras está comprometido coa nosa terra e a nosa xente polo que reivindicamos as oportunidades que achega a vida no rural. E máis cando se fai de xeito sostible. Por iso decidimos colaborar coa Asociación Obradoiros Artesáns da Terra Cha para crear a “Romaxe Artesá da Chaira” e axudar a manter vivos os nosos oficios achegándoos a quen valora o feito a man e o legado de séculos que atesoura. A primeira romaxe foi en maio de 2016 e, dado o éxito, repetimos cada ano :).

Naceu con vocación de permanencia e así será pola estupenda acollida que ten en cada edición

Que veredes 

Cando veñades ata a Muras na vindeira romaxe Artesá da Chaira atoparédesvos cun espazo pensado para adultos e nenos.  É un escaparate aberto para aprender a valorar a beleza dos oficios, con demostracións en vivo dos artesáns chairegos de cómo se traballan tecidos e granito, madeiras, metais, barro e vimbios. Obradoiros sobre cociña e artesanía e charlas sobre emprendemento sostible chaman a atención de moitos e moitas para ouvir de primeira man experiencias que funcionan.

Outros gozan coa música tradicional en vivo dando voltas polos postos e conta dun bo xantar, algo que xamais falta en calquera celebración galega e tampouco nesta!

Pódese tirar bo proveito dunha longa xornada de primaveira tanto á mañá como á tarde para ver, tocar, mercar, preguntar e aprender. E nun dos lugares máis bonitos de Muras: a fraga de A Veiga, á beira do río Eume cando pasa pola vila, rodeados de árbores e coa boa compañía da xente do corazón do Xistral.

Se vés en coche premede aquí para saber como chegar. Esperamos contar contigo na vindeira Romaxe, de seguro que repites! 😉

Trail das Bestas

Concello de Muras | Trail das Bestas |

A comezos de novembro organízase unha cita deportiva nova -comezou en 2017- pero que xa reúne a máis de 300 atletas de toda España que a valoran pola beleza da paisaxe, polo bo ambiente e o espírito de competitividade dunha maratón que, no punto máis alto, acada os 1002 metros.
 Aquí tedes o link á webun vídeo coa edición de 2018.

Os atletas de longa distancia pasan por espazos como A Gañidoira, Serra do Xistral e Río Eume nun trazado espectacular.


No Trail das Bestas de Muras hai categorías masculinas e femininas, son as seguintes para cada xénero:

  1. Senior Masculino desde os 18 ata os 45 anos.
  2. Senior Feminino desde os 18 ata os 45 anos.
  3. Veterán/a. A partir dos 46 anos.

E estas son as distancias das diferentes competicións.

  • Distancia Maratón 43 kms
  • Distancia Media 26 kms
  • Distancia Curta 14 km
  • Andaina 14 kms

Axudando coa organización, o Concello de Muras conta coa experiencia probada da empresa de actividades na natureza Marmar Outdoor, a firma de xestión de eventos deportivos Trackterace e tamén co apoio da Deputación de Lugo. Iso sin mencionar ás ducias de voluntarios e voluntarias cuxa axuda é inestimable no reparto de subministros aos competidores e competidoras e na loxística xeral. A organización ofrece fruta, barritas de cereais, xeles enerxéticos, agua e bebidas isotónicas. E ao final dunha dura mañá un bo plato quente para participantes e público, o que certamente agradécese…

Se es amante do running non o dubides e anota na túa axenda un oco para o vindeiro novembro.

Concello Starlight

Concello de Muras | Concello Starlight |

A limpeza dos nosos ceos e as inmellorables condicións de visión que achegan fan que dende 2020 Muras sexa dos escasísimos espazos galegos que conta co selo da Fundación Starlight.

Dende o concello comezouse a traballar en conseguilo dende 2018, conscientes de gozar dun enclave que reúne excelentes condicións para os afeccionados e amantes da astronomía. Por iso, ademais de iniciar as xestións para a obtención do selo, comenzáronse a organizar coa Sociedade Galega de Historia Natural  acampadas nocturnas e obradoiros de astrofotografía para todos os públicos, familias incluídas. Unha das mellores experiencias que se poden vivir na nosa natureza.

Rodeados de vales e montes de case mil metros, só dependemos do tempo. E cando os nosos ceos están limpos o espectáculo está garantido.

O sistema de certificación non só acredita estes lugares senón que representa un exemplo de protección e conservación duns escenarios que teñen na observación do firmamento parte do seu patrimonio natural e científico. Muras decidiuse a proveitar a astronomía como ferramenta para un turismo sostible, respectuoso coa contorna e baseado nos principios recolleitos na “Declaración sobre a Defensa do Ceo Nocturno e o Dereito á Luz das Estrelas”, que facemos nosos.

O concello
Praza da Galeguidade, 4
27836 Muras
Telf: 982.500001

Saúdo do alcalde
Teléfonos de interese
Textos legais