Lecturas que transforman: a maleta viaxeira chega a Muras

O Concello de Muras vén de recibir a Maleta Viaxeira (MAVI), un proxecto itinerante da Subdelegación do Goberno en Lugo que pon a disposición da veciñanza unha selección de lecturas sobre feminismo, autoestima e prevención da violencia de xénero.

A maleta estará aquí durante 3 meses e quen queira ler un destes ou todos os libros pode pasar polo Concello a recollelos.

A entrega realizouse nun encontro o pasado xoves 13 de agosto entre a subdelegada do Goberno, Olimpia López, o alcalde de Muras, Manuel Requeijo, e a tenente de alcalde, Paula Gómez.

Como funciona MAVI?

• 12 libros para todas as idades: Un lote de lecturas pensado para espertar o pensamento crítico.
• Un proxecto en movemento: Tres maletas percorren concellos, centros de información á muller (CIM), servizos sociais e centros penitenciarios da provincia de Lugo.
• Muras no mapa: Súmase a localidades como Sarria, Vilalba, Monforte, Viveiro, Taboada ou Ribera de Piquín.

Que lecturas atoparás?

• Clásicos: Insolación (Emilia Pardo Bazán) e La mujer del porvenir (Concepción Arenal).
• Sociedade: Desarmar la masculinidad (Beatriz Ranea), ou Maternidades S.A. (Laura Nuño).
• Saúde e territorio con ollada feminina: Mujeres invisibles para la medicina (Carme Valls) e Tierra de mujeres (María Sánchez).
• Narrativa e referentes: El color púrpura (Alice Walker), El lunes nos querrán (Najat El Hachmi), El bosque de los cuatro vientos (María Oruña), La tierra de las mujeres (Sandra Barneda) e Cuentos de buenas noches para niñas rebeldes (Cavallo e Favilli).